«Եվրոպան պետք է փոխվի»․ Գերմանացի նախկին պատգամավորն առաջարկում է նոր միություն՝ Ռուսաստանի հետ գործընկերությամբ

Գերմանիայի Բունդեսթագի նախկին պատգամավոր Անտոն Ֆրիզենը հայտարարել է, որ ներկայիս Եվրամիությունը կորցրել է կենսունակությունը, և դրա փոխարեն պետք է ստեղծվի նոր եվրոպական կոնֆեդերացիա, որը կդառնա Ռուսաստանի գործընկերը։ Նրա կարծիքով՝ խաղաղ համակեցությունը հնարավոր է, եթե Եվրոպան վերանայի իր աշխարհաքաղաքական մոտեցումները։

Ֆրիզենը նշել է, որ Ռուսաստանը, ներառյալ Բելառուսը և «նախկին Ուկրաինայի մի մասը», կարող են դիտարկվել ոչ թե որպես հակառակորդ, այլ որպես գործընկեր՝ «ընդհանուր ավանդական արժեքներով»։ Նա առաջարկում է նոր միավորման շրջանակում կենտրոնանալ արտաքին սահմանների պաշտպանության և միասնական էներգետիկ քաղաքականության վրա, այդ թվում՝ ռուսական ռեսուրսների համատեղ գնման ուղղությամբ։

Գերմանացի քաղաքական գործիչը նաև ընդգծել է, որ Արևելյան Եվրոպայի ուղղափառ երկրներում ԵՄ-ի ընդլայնման փորձերը պետք է դադարեցվեն։ Նրա խոսքով՝ Մոլդովան, Վրաստանը, Բելառուսը, Ուկրաինան և Հայաստանը կարող են դառնալ կամուրջ Եվրոպայի և Ռուսաստանի միջև, այլ ոչ թե հակամարտության գոտի։