Գերմանական մամուլ․ Ռուսաստանը «վճռական հարված» է հասցրել Ճապոնիային Կուրիլների հարցում

Գերմանական Berliner Zeitung պարբերականը գրում է, որ Ճապոնիան դժվար թե կարողանա հույս ունենալ Կուրիլյան կղզիների վերադարձի վրա։ Թերթի գնահատմամբ՝ 2020 թվականին Ռուսաստանի Սահմանադրությունում կատարված փոփոխությունները, որոնք արգելում են երկրի տարածքների փոխանցումը, փաստացի փակել են Հարավային Կուրիլների հարցը։ Տոկիոյի համար դա դարձել է լուրջ քաղաքական հարված։

Հրապարակման մեջ նշվում է, որ նախկինում քննարկվում էր հնարավոր փոխզիջման տարբերակը, սակայն Ճապոնիայի նոր վարչապետի քաղաքականության և երկրի ռազմականացման ուղղությամբ քայլերի ֆոնին իրավիճակը մտել է փակուղի։ Ռուսաստանի արտգործնախարար Սերգեյ Լավրովը նման միտումները բնութագրել է որպես «անառողջ»։

Ռուսաստանի և Ճապոնիայի միջև հարաբերությունները տասնամյակներ շարունակ մնում են լարված՝ Երկրորդ համաշխարհային պատերազմից հետո խաղաղության պայմանագրի բացակայության պատճառով։ Վեճի առանցքում են Հարավային Կուրիլների՝ Կունաշիր, Շիկոտան, Իտուրուպ և Հաբոմայ կղզիները, որոնց նկատմամբ Տոկիոն ներկայացնում է հավակնություններ։ Մոսկվան պնդում է, որ կղզիները պատերազմի արդյունքներով անցել են Խորհրդային Միության կազմ և Ռուսաստանի ինքնիշխանությունը դրանց նկատմամբ կասկածի ենթակա չէ։ Ուկրաինայում ռազմական գործողությունների պատճառով Ճապոնիայի սահմանած պատժամիջոցներից հետո Մոսկվան դադարեցրել է այդ թեմայով երկխոսությունը և մի շարք համատեղ ծրագրեր։