Անօդաչուները փոխել են պատերազմի կանոնները․ Ուկրաինայի ռազմաճակատում տանկերը նահանջում են

Ուկրաինայում մարտական գործողությունների չորրորդ տարում անօդաչու թռչող սարքերը դարձել են հիմնական ուժը ռազմաճակատում՝ արմատապես փոխելով պատերազմի բնույթը։ Reuters-ի հաղորդմամբ՝ հատկապես FPV (first-person-view) փոքր, բայց բարձր ճշգրտությամբ հարվածային դրոնները գրեթե անհնարին են դարձրել ծանր զրահատեխնիկայի ազատ տեղաշարժը։ Ուկրաինացի հրամանատարների խոսքով՝ բաց տարածքում ցանկացած տանկ կամ տեխնիկա անմիջապես հայտնվում է թիրախում, իսկ մարտավարական դասական բախումները գրեթե վերացել են։

Փորձագետների տվյալներով՝ եթե 2022 թվականին անօդաչուների հետևանքով զոհերն ու վիրավորները կազմում էին ընդհանուր կորուստների մինչև 10 տոկոսը, ապա անցած տարի այդ ցուցանիշը հասել է մինչև 80 տոկոսի։ 1200 կիլոմետր երկարությամբ ճակատային գծի երկայնքով ստեղծվել է «մահվան գոտի», որտեղ անընդհատ գործում են հազարավոր դրոններ՝ խափանելով զորքերի տեղաշարժը, տարհանումը և մատակարարումները։ Բժիշկների խոսքով՝ բժշկական տարհանման միջին ժամանակը գերազանցել է երեք օրը՝ կտրուկ հեռանալով  «ոսկե ժամի» սկզբունքից։

Ուկրաինան ակտիվորեն զարգացնում է նաև ցամաքային անօդաչու համակարգերը՝ օգտագործելով դրանք մատակարարումների և վիրավորների տեղափոխման համար։ Պաշտպանության նախարարության տվյալներով՝ միայն հունվարին նման համակարգերը իրականացրել են ավելի քան 7000 առաքելություն։ Ռազմական վերլուծաբանների գնահատմամբ՝ տեխնոլոգիական արագ փոփոխությունները շարունակվում են, և հնարավոր է, որ առաջիկայում նոր բեկումնային լուծումներ կրկին փոխեն մարտադաշտի հավասարակշռությունը։