Մոնղոլիայի յուրաքանչյուր քաղաքացի կստանա 18 դոլար՝ Չինաստան արտահանված ածխից

Մոնղոլիայի խոշորագույն պետական ընկերությունը՝ «Эрдэнэс Таван-толгой»-ը, հայտարարել է, որ երկրում յուրաքանչյուր քաղաքացի կստանա մոտ 18 դոլարի չափով շահաբաժին՝ Չինաստան արտահանված ածխի վաճառքից։ Տեղեկությունը փոխանցել է ՏԱՍՍ-ը՝ հղում անելով ընկերության մամուլի ծառայությանը։ Վճարումները նախատեսվում է իրականացնել մինչև ապրիլի 30-ը։

Ընկերության ներկայացուցիչների պարզաբանմամբ՝ դեռևս 2012 թվականին պետական բաժնետիրական ընկերության բաժնետոմսերի մի մասը բաշխվել էր երկրի բոլոր քաղաքացիների միջև։ Երկու տարի առաջ իշխանությունները որոշել էին բաժնետոմսեր հատկացնել նաև այն քաղաքացիներին, որոնք ծնվել են առաջին բաշխումից հետո։

Տավան-Տոլգոյ հանքավայրը, որտեղ գտնվում են մոտ յոթ միլիարդ տոննա պաշարներով ածխի հանքեր, հայտնաբերվել է խորհրդային երկրաբանների կողմից 1950-ականներին։ 2008 թվականին հանքավայրը վերադարձվել է պետության վերահսկողության տակ։ Մոնղոլիան այսօր համարվում է Չինաստանի ածխի շուկայի կարևոր մատակարարներից մեկը և մրցակցում է Ռուսաստանի հետ այդ ուղղությամբ։