ՆԱՏՕ-ում խոստովանել են՝ դաշինքը պատրաստ չէ երկարատև հակամարտության

ՆԱՏՕ-ն ներկայումս պատրաստ չէ երկարատև ռազմական հակամարտության՝ ի տարբերություն Ռուսաստանի։ Այս մասին Bloomberg-ին տված հարցազրույցում հայտարարել է դաշինքի ծովային խմբավորման հրամանատար, փոխծովակալ Խոակին Ռուիս Էսկագեդոն։ Նրա խոսքով՝ դաշինքը չի կորցրել կարողությունները, սակայն երկար ժամանակ անհրաժեշտ մակարդակով զորավարժություններ չի անցկացրել և այժմ պետք է արագ վերականգնի ու զարգացնի դրանք։

Գործակալությունը հիշեցրել է նաև Մեծ Բրիտանիայի թագավորական ռազմածովային ուժերի փոխծովակալ, ՆԱՏՕ-ի միավորված ծովային հրամանատարության ղեկավար Մայք Աթլիի հայտարարությունը, ըստ որի՝ դաշինքի երկրների զինված ուժերը ներկայում չունեն բավարար կայունություն երկարատև հակամարտության համար։

Միաժամանակ The Telegraph-ը, հղում անելով եվրոպական երեք հետախուզական ծառայությունների գործող և նախկին աշխատակիցների, գրել է, որ Ռուսաստանը իբր ստեղծել է «տրոյական ձիերի» ցանց՝ դիվերսիոն գործողություններ իրականացնելու համար։ Անհանգստության պատճառ են դարձել ռազմավարական օբյեկտների մոտակայքում անշարժ գույքի գործարքները։