ԱՄՆ-ում սպանված ուկրաինուհու գործով նոր մանրամասներ․ կասկածյալը յոթ ժամ ճանապարհ է անցել հանցագործության համար

ԱՄՆ-ում հայտնի են դարձել 21-ամյա ուկրաինուհի Եկատերինա Տովմաշի և նրա 28-ամյա զուգընկերոջ՝ ամերիկացի զինծառայող Մեթյու Ուեյդի սպանության նոր մանրամասները։ Ըստ հրապարակումների՝ ենթադրյալ հանցագործը՝ 25-ամյա Քալեբ Հեյդեն Ֆոսնոն Օհայո նահանգից, նախապես պլանավորել է հարձակումը և շուրջ յոթ ժամ ճանապարհ անցել՝ հասնելու համար Հյուսիսային Կարոլինա։

Քննության տվյալներով՝ փետրվարի 14-ի վաղ առավոտյան նա ներխուժել է տուն, արթնացրել աղջկան և կրակ բացել։ Կրակոցները տեղի են ունեցել աղջկա հարազատների ներկայությամբ։ Հարձակումից հետո Ֆոսնոն փորձել է փախուստի դիմել, սակայն նույն օրը ձերբակալվել է ճանապարհային կանոնների խախտման համար կանգնեցվելուց հետո։ Ձերբակալությունը տեղի է ունեցել առանց դիմադրության։ Պաշտոնական դրդապատճառը դեռ չի հրապարակվել, սակայն հարազատները ենթադրում են, որ պատճառը խանդն ու բաժանումից հետո առաջացած վեճն էր։

Եկատերինայի եղբայրը հայտնել է, որ աղջկան կհուղարկավորեն Յուտա նահանգի Սենթ Ջորջ քաղաքում, որտեղ ընտանիքը նախկինում բնակվել է, իսկ հուղարկավորությունը նախատեսված է մարտի 3-ին։ Ավելի վաղ՝ 2025 թվականի սեպտեմբերին, Հյուսիսային Կարոլինայում սպանվել էր նաև մեկ այլ ուկրաինուհի՝ 23-ամյա Իրինա Զարուցկայան․ կասկածյալը ձերբակալվել էր դեպքից անմիջապես հետո։