Ցուցուլյանը անձնակազմերին է ներկայացրել ենթակա ծառայությունների նորանշանակ ղեկավարներին. մանրամասներ

ՆԳՆ ոստիկանության պետ-ՆԳ նախարարի տեղակալ Կամո Ցուցուլյանը ոստիկանության ենթակա ծառայությունների անձնակազմերին է ներկայացրել նորանշանակ ղեկավարներին։

Կատարած աշխատանքի համար շնորհակալություն հայտնելով Արթուր Խուդինյանին՝ Կամո Ցուցուլյանը ներկայացրել է Պարեկային ծառայության նորանշանակ պետ Գևորգ Զաքարյանին և մաղթել արդյունավետ աշխատանք։

Ոստիկանության պետը նաև Համայնքային ոստիկանության գլխավոր վարչության անձնակազմին է ներկայացրել վարչության պետի պարտականությունները կատարող Կարեն Խաչատրյանին։

Կարևորելով բնակչության հետ կապի և համակարգի հանդեպ վստահության ամրապնդման գործում Համայնքային ոստիկանության դերը՝ Կամո Ցուցուլյանը շնորհակալություն է հայտնել Կարեն Հակոբյանին և հաջողություններ մաղթել հետագա գործունեության մեջ։

Քրեական ոստիկանության ծառայողներին ներկայացնելով գլխավոր վարչության նորանշանակ պետ Արթուր Բարսեղյանին՝ Կամո Ցուցուլյանն ընդգծել է հանցավորության դեմ պայքարի և հասարակական անվտանգության ապահովման գործում նրանց առանցքային դերը։

Ծառայության ընթացքում արձանագրված արդյունքների համար շնորհակալություն հայտնելով Վարդան Վարդանյանին՝ Կամո Ցուցուլյանը վստահություն է հայտնել, որ Քրեական ոստիկանության գլխավոր վարչության նոր ղեկավարի գլխավորությամբ ծառայությունը կշարունակի արդյունավետ աշխատանքը՝ պահպանելով մասնագիտական բարձր նշաձողն ու ծառայողական պատասխանատվությունը։

Ոստիկանության պետը նորանշանակ ղեկավարներին հանձնարարել է ակտիվացնել հանցավորության դեմ պայքարի, համայնքների հետ համագործակցության և ճանապարհային անվտանգության ապահովման ուղղությամբ աշխատանքը, ինչը քաղաքացիների համար առավել անվտանգ և ապահով միջավայրի ձևավորման, հասարակական կարգի ամրապնդման և համակարգի նկատմամբ վստահության բարձրացման կարևոր նախապայման է։