Բալիում հայտնաբերվել են ենթադրյալ քրեական հեղինակության որդու մարմնի մասեր

Ինդոնեզիայի Բալի կղզում տեղացիները հայտնաբերել են մարդու մարմնի մասեր, որոնք նախնական տվյալներով կարող են պատկանել Ուկրաինայի քաղաքացի Իգոր Կոմարովին՝ քրեական հեղինակություն Սերգեյ Կոմարովի որդուն։ Այս մասին հայտնում է ինդոնեզիական Kumparan News պարբերականը։

Հաղորդվում է, որ փետրվարի 26-ին՝ տեղական ժամանակով առավոտյան ժամը 10:00-ի սահմաններում, հայտնաբերվել են գլխի հատվածներ և մարմնի այլ մասեր։ Քննության նախնական գնահատմամբ՝ զոհը մահացած է եղել ավելի քան երեք օր։ Նշվում է նաև, որ հայտնաբերված մարմնի վրա առկա է դաջվածք, որը կարող է համապատասխանել ավելի վաղ առևանգված ուկրաինացու նկարագրությանը։

Միևնույն ժամանակ ոստիկանությունը դեռ չի հաստատել, որ մարմինը պատկանում է Կոմարովին․ իրականացվում է ԴՆԹ փորձաքննություն՝ ուկրաինական հյուպատոսության հետ համագործակցությամբ։ Ավելի վաղ ուկրաինական լրատվամիջոցները հայտնել էին Իգոր Կոմարովի և մեկ այլ ուկրաինացու առևանգման մասին, նշելով, որ պահանջվել է 10 միլիոն դոլարի փրկագին։