Ռուս թենիսիստները ռազմական լարվածության պատճառով Դուբայից ԱՄՆ են հասել բարդ ճանապարհով

Ռուս թենիսիստ Կարեն Խաչանովը պատմել է, թե ինչպես է Դուբայից հասել ԱՄՆ՝ մասնակցելու Masters շարքի մրցաշարին։ Նրա խոսքով՝ ճանապարհը բավականին բարդ է եղել, քանի որ տարածաշրջանում ռազմական գործողությունների պատճառով օդային տարածքը փակվել էր։

Խաչանովը նշել է, որ ամենադժվար հատվածը մեքենայով Դուբայից Օման հասնելն էր։ Այնուհետև մարզիկները մասնավոր ինքնաթիռով մեկնել են Ստամբուլ, որտեղ կարճ ժամանակով հանգստացել են հյուրանոցում, և միայն հետո շարունակել ճանապարհը դեպի ԱՄՆ։ Նրա խոսքով՝ երկար ճանապարհից հետո բոլորը զգում էին հոգնածություն։

Նույն ճանապարհով Դուբայից ԱՄՆ են հասել նաև ռուս թենիսիստներ Դանիիլ Մեդվեդևն ու Անդրեյ Ռուբլյովը։ Մեդվեդևը նշել է, որ ամբողջ իրավիճակը հիշեցնում էր հոլիվուդյան ֆիլմի սցենար՝ սահմաններ հատելով և նոր երկիր այցելելով։ Նրանք այժմ պատրաստվում են մասնակցել ԱՄՆ-ի Ինդիան Ուելս քաղաքում մարտի 4-ին մեկնարկած Masters մրցաշարին, որտեղ իրենց ելույթները կսկսեն երկրորդ փուլից։