Իսրայելը հարվածներ է հասցրել «Հեզբոլլահի» հրամանատարական կենտրոններին Բեյրութում

Իսրայելի պաշտպանության բանակը (IDF) հայտարարել է, որ գիշերվա ընթացքում հարվածներ է հասցրել Լիբանանի մայրաքաղաք Բեյրութում գտնվող «Հեզբոլլահ» շարժման մի շարք հրամանատարական կենտրոնների։ Իսրայելական կողմի տվյալներով՝ գործողությունը իրականացվել է հետախուզական տվյալների հիման վրա։

IDF-ի փոխանցմամբ՝ հարվածների թիրախում են եղել Իրանի աջակցությունը ստացող զինված խմբավորման կառավարման կետերը, որոնցից մեկը օգտագործվել է «Հեզբոլլահի» անօդաչու թռչող սարքերի ստորաբաժանման կողմից։ Իսրայելը վերջին օրերին շարունակել է ինտենսիվ հարվածներ հասցնել Լիբանանի տարբեր շրջանների ուղղությամբ։

Ռազմական գործողությունների սրումը տեղի է ունեցել այն բանից հետո, երբ «Հեզբոլլահը» Լիբանանի տարածքից հրթիռներ է արձակել Իսրայելի ուղղությամբ։ Իսրայելական բանակը նաև տարհանման կոչեր է արել Լիբանանի հարավի տասնյակ բնակավայրերի և Բեյրութի մոտ գտնվող տարածքների բնակիչներին։ Մերձավոր Արևելքում վերջին սրացման ընթացքում Իրանից հետո ամենամեծ զոհերի թիվը գրանցվել է հենց Լիբանանում։