Փհենյանը դատապարտել է Իրանի դեմ գործողությունները, սակայն լռել է Խամենեիի մահվան մասին

Հյուսիսային Կորեայի պետական լրատվամիջոցները քննադատել են ԱՄՆ-ին և Իսրայելին՝ Իրանի դեմ սկսված ռազմական գործողությունները բնութագրելով որպես «ագրեսիվ պատերազմ»։ Սակայն Փհենյանի պաշտոնական մեդիան չի հաղորդել Իրանի գերագույն առաջնորդ Այաթոլլա Ալի Խամենեիի և Իրանի բարձրագույն ղեկավարության մի շարք ներկայացուցիչների մահվան մասին։

Վերլուծաբանների գնահատմամբ՝ այս լռությունը պատահական չէ։ Հյուսիսային Կորեայի քաղաքական համակարգը կառուցված է առաջնորդի գրեթե առասպելական հեղինակության և անխոցելիության գաղափարի շուրջ, և նման տեղեկության հրապարակումը կարող էր վտանգավոր նախադեպ ստեղծել երկրի ներսում։

Եթե պետական լրատվամիջոցները բացահայտ ցույց տան, որ նույնիսկ խիստ վերահսկվող պետության ամենահզոր առաջնորդը կարող է հայտնաբերվել և սպանվել, դա կարող է խաթարել իշխանության կառուցած գաղափարական պատկերը։ Այդ պատճառով Փհենյանը նման տեղեկատվություն ներքին լսարանի համար տարածելու շահագրգռվածություն չունի։