Հարրին և Մեգան Մարքլը ցանկանում են օգնել բրիտանական թագավորական ընտանիքին

Բրիտանական արքայազն Հարրին կարծում է, որ իր հորեղբոր՝ նախկին արքայազն Էնդրյուի ձերբակալությունը ցույց է տալիս, որ միապետական համակարգը փոփոխությունների կարիք ունի։ Այդ մասին գրում է The International News-ը՝ հղում անելով արքայական ընտանիքին մոտ կանգնած աղբյուրներին։

Ըստ տեղեկությունների՝ Հարրին համոզված է, որ թագավորական ընտանիքին անհրաժեշտ են ավելի մեծ թափանցիկություն և երիտասարդ ղեկավարություն։ Նշվում է, որ նա և իր կինը՝ Մեգան Մարքլը, կարող են օգնել լրացնել առաջացած ճգնաժամային վակուումը։ Աղբյուրների փոխանցմամբ՝ Հարրին, որը հուլիսին նախատեսում է այցելել Մեծ Բրիտանիա, ցանկանում է օգտագործել այս իրավիճակը որպես հնարավորություն՝ հաշտեցման և ընտանիքին աջակցելու համար։

Փորձագետների գնահատմամբ՝ զույգի վերջերս կատարած այցը Հորդանան կարող էր նաև ազդակ լինել արքայազն Ուիլյամի և Քեյթ Միդլթոնի համար՝ ցույց տալու, որ Սասեքսի դուքսն ու դքսուհին պատրաստ են վերականգնել հարաբերությունները։ Միևնույն ժամանակ հաղորդվում է, որ թագավոր Չարլզ III-ի և նրա ժառանգի հարաբերություններում լարվածությունը շարունակում է աճել։