Թրամփը հայտարարել է, որ ԱՄՆ-ը չի ցանկանում Իրանում տեսնել ևս մեկ «Խամենեիի նման» առաջնորդ

ԱՄՆ նախագահ Դոնալդ Թրամփը հայտարարել է, որ Վաշինգտոնը չի ցանկանում, որպեսզի Իրանի ղեկավարի պաշտոնում հայտնվի ևս մեկ առաջնորդ, որը նման կլինի երկրի ներկայիս գերագույն առաջնորդ Այաթոլլա Ալի Խամենեիին։ Այս մասին նա ասել է Time ամսագրին տված հարցազրույցում։

Թրամփի խոսքով՝ ինքը չի ցանկանում անցնել ամբողջ գործընթացի միջով, որպեսզի արդյունքում Իրանը կրկին ունենա նույն քաղաքական գիծը շարունակող առաջնորդ։ Նա ընդգծել է, որ թեև իրանցիները կարող են ինքնուրույն ընտրել նոր ղեկավար, ԱՄՆ-ը ցանկանում է համոզված լինել, որ այդ մարդը «խելամիտ վերաբերմունք կունենա Միացյալ Նահանգների նկատմամբ»։

Ավելի վաղ Թրամփը հայտարարել էր, որ ցանկանում է անձամբ մասնակցել Իրանի նոր առաջնորդի ընտրության գործընթացին։ Նա նաև նշել է, որ Իրանի իշխանությունները «ժամանակ են կորցնում» նոր գերագույն առաջնորդ ընտրելու հարցում՝ հավելելով, որ Խամենեիի որդին՝ Մոջթաբա Խամենեին, այդ պաշտոնի համար լուրջ թեկնածու չի հանդիսանում։