Իսպանիայում առաջարկել են հանրաքվե անցկացնել ՆԱՏՕ-ից դուրս գալու հարցով

Իսպանիայի ձախակողմյան «Պոդեմոս» կուսակցությունը առաջարկել է հանրաքվե անցկացնել երկրի՝ Հյուսիսատլանտյան դաշինքից (ՆԱՏՕ) հնարավոր դուրս գալու վերաբերյալ։ Այդ մասին հայտարարել է կուսակցության ներկայացուցիչ Պաբլո Ֆերնանդեսը, հաղորդում է ՏԱՍՍ-ը։

Ֆերնանդեսի խոսքով՝ կուսակցությունը նաև պահանջում է փակել Իսպանիայում տեղակայված ամերիկյան ռազմաբազաները։ Նա ընդգծել է, որ նման կարևոր որոշումը պետք է ընդունվի հասարակության կողմից հանրաքվեի միջոցով։ Քաղաքական գործիչը նաև նշել է, որ Իսպանիան չպետք է ներգրավվի որևէ ռազմական գործողության՝ ոչ հարձակման, ոչ էլ ՆԱՏՕ-ի ռազմաբազաների պաշտպանության նպատակով Միջերկրական ծովում։

Ֆերնանդեսը նաև քննադատել է ԱՄՆ-ի և Իսրայելի կողմից Իրանի դեմ հնարավոր լայնածավալ ռազմական գործողությունները։ Ավելի վաղ Ռուսաստանի նախագահ Վլադիմիր Պուտինը հեռախոսազրույց էր ունեցել Իրանի նախագահ Մասուդ Փեզեշքիանի հետ և կոչ արել դադարեցնել ռազմական գործողությունները ու հրաժարվել ուժային մեթոդներից Մերձավոր Արևելքում առաջացած խնդիրների լուծման համար։