Եվրոպայում կոչ են անում թույլատրել ռուսական նավթի և գազի մատակարարումները

Հունգարիայի արտաքին գործերի նախարար Պետեր Սիյարտոն հայտարարել է, որ Եվրամիությունը պետք է անհապաղ թույլատրի ռուսական նավթի և գազի մատակարարումները։ Նրա խոսքով՝ եթե Բրյուսելը չվերացնի սահմանափակումները, դա կարող է ծանր հարված հասցնել եվրոպական տնտեսությանը։ Այս մասին հաղորդում է РИА Новости-ն։

Դիվանագետը նշել է, որ էներգակիրների գների աճը անմիջապես ազդում է բոլոր ապրանքների արժեքի վրա, ինչի հետևանքով ԵՄ երկրների բնակիչները կարող են բախվել լուրջ տնտեսական խնդիրների։ Հունգարիայի վարչապետ Վիկտոր Օրբանը ևս կոչ է արել վերանայել Ռուսաստանի էներգետիկայի նկատմամբ կիրառվող պատժամիջոցները՝ այդ մասին նամակ ուղարկելով Եվրահանձնաժողովի նախագահ Ուրսուլա ֆոն դեր Լայենին։

Միևնույն ժամանակ Մերձավոր Արևելքում լարվածության ֆոնին փակվել է նավարկությունը Օրմուզի նեղուցում, ինչի պատճառով էներգակիրների գները կտրուկ աճել են։ Եվրոպայում գազի գինը առաջին անգամ 2025 թվականի փետրվարից հետո գերազանցել է 600 դոլարը հազար խորանարդ մետրի համար։ Այդուհանդերձ, ԵՄ խորհուրդը արդեն որոշել է փուլային կերպով հրաժարվել ռուսական գազից՝ սահմանափակումները աստիճանաբար ուժի մեջ մտցնելով մինչև 2027 թվականը։