Իսրայելը սկսել է սահմանափակ ցամաքային գործողություն Լիբանանի հարավում

Իսրայելի պաշտպանության բանակը (ՑԱԽԱԼ) հայտարարել է, որ սկսել է սահմանափակ ցամաքային ռազմական գործողություն Լիբանանի հարավում՝ ուղղված շիական «Հեզբոլլա» շարժման դեմ։ Այդ մասին հաղորդվում է բանակի պաշտոնական Telegram-ալիքում։

Բանակի տվյալներով՝ գործողությունը սկսվել է երկուշաբթի գիշերը և ներառում է նպատակային գործողություններ՝ զինյալների հայտնաբերման, ոչնչացման և «Հեզբոլլայի» ենթակառուցվածքների ապամոնտաժման համար։ Մինչ ցամաքային ուժերի ներգրավումը իսրայելական բանակը հարվածներ է հասցրել նաև օդից և հրետանային միջոցներով՝ խոցելով շարժման մի շարք թիրախներ։

ՑԱԽԱԼ-ի հաղորդագրության համաձայն՝ գործողությունը նպատակ ունի ամրապնդել պաշտպանական դիրքերը և ապահովել Իսրայելի հյուսիսային շրջանների բնակիչների անվտանգությունը։ Ավելի վաղ Լիբանանի նախագահ Ժոզեֆ Աունը երկրի բանակին հրահանգել էր չդիմակայել իսրայելական ուժերին, եթե սկսվի նման գործողություն՝ նշելով, որ չի ցանկանում վտանգի ենթարկել լիբանանցի զինվորների կյանքը։