Տուսկը բենզինի թանկացման հարցերով առաջարկել է դիմել «մյուս Դոնալդին»

Լեհաստանի վարչապետ Դոնալդ Տուսկը հայտարարել է, որ վառելիքի գների աճի վերաբերյալ հարցերը պետք է ուղղել ԱՄՆ նախագահ Դոնալդ Թրամփին։ Այդ մասին նա ասել է լրագրողների հետ զրույցում, հաղորդում է РИА Новости-ն։

Տուսկի խոսքով՝ Լեհաստանի կառավարությունը չի կարող ազդել համաշխարհային վառելիքի գների վրա։ Նա կատակով նշել է, որ «մյուս Դոնալդը»՝ նկատի ունենալով Թրամփին, իրական ազդեցություն ունի համաշխարհային էներգետիկ շուկաների վրա, և հենց նրան պետք է ուղղել այդ հարցերը, ոչ թե «համեստ լեհ Դոնալդին»։

Վառելիքի գների աճը պայմանավորված է Մերձավոր Արևելքում սրվող լարվածությամբ և Օրմուզի նեղուցում նավթային փոխադրումների խափանումներով։ Արդյունքում նավթի գինը առաջին անգամ վերջին չորս տարվա ընթացքում գերազանցել է 100 դոլարը մեկ բարելի համար, իսկ որոշ պահերի հասել է մինչև 115 դոլարի։ Փորձագետների կարծիքով՝ եթե նման բարձր գները պահպանվեն երկար ժամանակ, դա կարող է լուրջ հարված հասցնել համաշխարհային տնտեսությանը։