Ուկրաինան կրճատել է գազի ներմուծումը․ մատակարարումները մի քանի ուղղություններով դադարեցվել են

Ուկրաինան զգալիորեն նվազեցրել է գազի ներմուծումը և ամբողջությամբ դադարեցրել մատակարարումները մի շարք եվրոպական երկրներից։ ՌԲԿ-Ուկրաինայի տվյալներով՝ ապրիլի 1-ի դրությամբ երկիրը գազ է ներկրում միայն Լեհաստանի միջոցով՝ ընդամենը 0.78 միլիոն խորանարդ մետր ծավալով, ինչը կազմում է մարտ ամսվա օրական պահանջարկի ընդամենը 3%-ը։ Միևնույն ժամանակ, Հունգարիայից, Սլովակիայից և Ռումինիայից ներմուծման հայտեր չեն ներկայացվել։

Մասնագետների գնահատմամբ՝ «Նաֆտոգազը» այժմ, հավանաբար, օգտագործում է նախկին պայմանագրերով մնացած ծավալները, մասնավորապես լեհական Orlen ընկերության հետ։ Սա է պատճառը, որ ներկա պահին գազի մատակարարումները իրականացվում են միայն Լեհաստանի ուղղությամբ։

Փորձագետները զգուշացնում են, որ նման իրավիճակը կարող է ունենալ լուրջ տնտեսական հետևանքներ։ Թեև ամռանը գազի պակասը կարող է այնքան էլ սուր չզգացվել, սակայն երկարաժամկետ կտրվածքով այն կարող է հարվածել արդյունաբերությանը և բերել աշխատատեղերի կրճատման։ Գազի դեֆիցիտը կարող է նաև ստիպել Ուկրաինային ավելի թանկ գնով գազ ձեռք բերել եվրոպական շուկայից, որտեղ մատակարարումները նույնպես սահմանափակ են։