Համբարձում Մաթևոսյանը ԱԳՆ-ում ներկայացրել է COP17-ի նախապատրաստական աշխատանքները

Այսօր Արտաքին գործերի նախարարությունում Շրջակա միջավայրի նախարար Համբարձում Մաթևոսյանը հանդիպում է ունեցել ՀՀ-ում հավատարմագրված դիվանագիտական առաքելությունների և միջազգային կազմակերպությունների ներկայացուցիչների հետ՝ ներկայացնելու COP17 համաժողովի նախապատրաստական աշխատանքների առաջընթացը։

Սա նման ձևաչափով արդեն երկրորդ հանդիպումն էր, ինչը հնարավորություն է տալիս շարունակել բաց, ներառական և արդյունավետ երկխոսությունը գործընկերների հետ։

Նախարար Մաթևոսյանը ներկայացրել է մինչ այս կատարված աշխատանքները և առաջիկա քայլերը՝ ընդգծելով, որ Հայաստանը լիարժեք հանձնառու է համաժողովի կազմակերպման գործընթացը վարել թափանցիկության, համապարփակ մասնակցության և բարձր հավակնության սկզբունքներով։ Նախարարության նպատակն է COP17-ը դարձնել շրջադարձային փուլ՝ կենսաբազմազանության պահպանության և կայուն զարգացման գլոբալ օրակարգում։

Այս համատեքստում նախարար Մաթևոսյանն անդրադարձել է նաև միջազգային և օրենսդրական վերջին զարգացումներին, այդ թվում՝ Մոնրեալում անցկացված հանդիպումների արդյունքներին և Նագոյայի արձանագրության վավերացմանը, որոնք կարևոր հիմք են ստեղծում համաժողովի հաջող անցկացման համար։

Հանդիպման ընթացքում Ատաքին գործերի նախարարի տեղակալ Ռոբերտ Աբիսողոմոնյանը խոսել է առաջիկա COP17-ին նախորդող Առաջնորդների գագաթնաժողովի դերի մասին՝ որպես բարձր մակարդակով քաղաքական հանձնառության ամրապնդման հարթակի։

Հանդիպման ընթացքում մանրամասն ներկայացվել է նաև COP17-ի նախապատրաստական աշխատանքները, ինչպես նաև ցուցադրվել համաժողովի տարբերանշանին նվիրված հոլովակը։

Հանդիպումն ամփոփվել է հարցուպատասխանով։

COP17-ը Երևանում պետք է դառնա այն հարթակը, որտեղ կամրապնդվի անցումը պարտավորություններից դեպի իրական գործողություններ՝ հանուն բնության պահպանության։ Հայաստանը պատրաստ է սերտ համագործակցել բոլոր գործընկերների հետ՝ ապահովելու համար, որ համաժողովի արդյունքները լինեն շոշափելի և արդյունավետ։