Լուկաշենկոն հայտարարել է՝ Արևմուտքը նախանձում է իր բարձր վարկանիշին

Բելառուսի նախագահ Ալեքսանդր Լուկաշենկոն հայտարարել է, որ արևմտյան երկրների ղեկավարները կարող են նախանձել իր բարձր ժողովրդական աջակցությանը։ Այս մասին նա խոսել է RT-ի հաղորդավար Ռիկ Սանչեսին տված հարցազրույցում՝ անդրադառնալով իր նկատմամբ հնչող քննադատությանը։

Նրա խոսքով՝ որոշ արևմտյան քաղաքական գործիչների քննադատությունը կարող է պայմանավորված լինել հենց այն հանգամանքով, որ իր աջակցությունը բնակչության շրջանում զգալիորեն բարձր է։ Լուկաշենկոն նշել է, որ տարբեր հարցումների համաձայն՝ իր վարկանիշը հասնում է շուրջ 70-78 տոկոսի։

Միաժամանակ նա ընդգծել է, որ քաղաքական գործիչների միջև նման «նախանձը» բնական երևույթ է՝ հավելելով, որ շատ կցանկանար, որ արևմտյան առաջնորդներն ունենային թեկուզ 60 տոկոս աջակցություն։ Լուկաշենկոն նաև քննադատել է մի շարք արևմտյան ղեկավարների՝ նրանց անվանելով «ժամանակավոր» առաջնորդներ։