ԱՄՆ-ը մեկ ամսով թուլացրել է սահմանափակումները ռուսական նավթի գործարքների համար

ԱՄՆ ֆինանսների նախարարությունը հայտարարել է, որ երկարաձգում է ռուսական նավթի հետ կապված որոշ գործարքների թույլտվությունը՝ ևս մեկ ամսով։ Ինչպես հայտնում է РИА Новости-ը, նոր լիցենզիան թույլ է տալիս իրականացնել նավթի վաճառք, տեղափոխում և բեռնաթափում, եթե այն տանկերներում բեռնված է եղել մինչև ապրիլի 17-ը։

Նոր որոշումը գործելու է մինչև մայիսի 16-ը։ Ավելի վաղ նմանատիպ սահմանափակումները մեղմացվել էին մարտին, երբ թույլատրվել էին գործարքներ մինչև մարտի 12-ը բեռնված նավթի համար։ Միաժամանակ ԱՄՆ ֆինանսների նախարարությունը նշել է, որ ընդհանուր առմամբ չի նախատեսում շարունակաբար երկարաձգել նման թույլտվությունները։

Մինչ այդ Իրանը ժամանակավորապես բացել էր Օրմուզի նեղուցը՝ Լիբանանի և Իսրայելի միջև հաստատված հրադադարի ֆոնին, ինչը հանգեցրել էր նավթի համաշխարհային գների նվազման։ Brent տեսակի նավթի արժեքը իջել էր մեկ բարելի դիմաց 90 դոլարից ցածր՝ հասնելով մոտ 87,8 դոլարի, ինչը ևս ազդել է շուկայի ընդհանուր տրամադրությունների վրա։