Թրամփը և ԱՄՆ հարկային ծառայությունը բանակցում են 10 մլրդ դոլարի հայցը հաշտությամբ փակելու շուրջ

ԱՄՆ նախագահ Դոնալդ Թրամփի իրավաբանները բանակցություններ են վարում Internal Revenue Service (IRS)-ի հետ՝ 10 միլիարդ դոլարի հայցը հաշտությամբ լուծելու նպատակով։ Գործը վերաբերում է Թրամփի հարկային հայտարարագրերի արտահոսքին, որը 2019-2020 թվականներին հայտնվել էր լրատվամիջոցներում։

Կողմերը դատարանից խնդրել են գործը 90 օրով կասեցնել՝ հնարավորություն տալու համար հասնել համաձայնության և խուսափել երկարատև դատավարությունից։ Գործը բարդանում է նրանով, որ Թրամփը փաստացի դատի է տվել իր սեփական կառավարությանը, իսկ արդարադատության նախարարությունը միաժամանակ ներկայացնում է IRS-ի շահերը։

Հայցը առաջացել է նախկին պայմանագրային աշխատակցի կողմից տվյալների արտահոսքից հետո, որի հետևանքով հրապարակվել էին տեղեկություններ, թե Թրամփը տարիներ շարունակ քիչ կամ ընդհանրապես եկամտային հարկ չի վճարել։ Եթե գործը ավարտվի հաշտությամբ, հնարավոր փոխհատուցումը, ըստ փորձագետների, կարող է վճարվել պետական միջոցներից, այսինքն՝ հարկատուների հաշվին։