2026 թվականի վոլեյբոլի առաջնությունում ՆԳՆ հավաքական թիմը զբաղեցրել է առաջին տեղը (ՏԵՍԱՆՅՈՒԹ)

Ապրիլի 17-ին «Դինամո» մարզադահլիճում կայացել է Իրավապահ մարմինների 2026 թվականի վոլեյբոլի առաջնությունը՝ մեկ հարկի տակ համախմբելով տարբեր գերատեսչությունների հավաքական թիմերին։

Դիտարժան մրցապայքար է ծավալվել ՆԳ նախարարության և Ազգային անվտանգության ծառայության հավաքական թիմերի միջև։

Ներկա էին ՆԳ նախարար Արփինե Սարգսյանը, նախարարության և ենթակա ծառայությունների ղեկավար կազմը։

Դահլիճում մթնոլորտը մրցակցային էր։

Համառ պայքարում ՆԳ նախարարության հավաքական թիմը նշանակալի հաղթանակ տարավ։

Ոստիկանության օրվան նվիրված առաջնությանը մասնակցել են նաև Քննչական կոմիտեի, Հակակոռուպցիոն կոմիտեի, Գլխավոր դատախազության և Պետական եկամուտների կոմիտեի հավաքական թիմերը և մրցանակային տեղերը բաշխվել են ըստ գրանցած արդյունքների ։

Տեղի է ունեցել պարգևատրման հանդիսավոր արարողություն։
Երկրորդ և երրորդ մրցանակային տեղերը համապատասխանաբար զբաղեցրել են Ազգային անվտանգության ծառայության և Պետական եկամուտների կոմիտեի հավաքական թիմերը։

Վոլեյբոլի առաջնությունում հաղթողի կոչումը նվաճել է ՆԳ նախարարության հավաքական թիմը։

Հաղթողներին շնորհվել են հավաստագրեր և համապատասխան կարգի մեդալներ։

Ազգային անվտանգության ծառայության ղեկավար կազմի կողմից ՆԳՆ հավաքական թիմի անդամ, պարեկային ծառայող Հովհաննես Սարգսյանը ճանաչվել է «Լավագույն խաղացող»՝ արժանանալով հատուկ պարգևի։

ՆԳ նախարար Արփինե Սարգսյանը փայլուն մրցելույթների համար շնորհավորել է առաջնության մասնակիցներին և նշել, որ նման ձևաչափով հանդիպումները վաղուց արդեն դուրս են եկել մրցակցային շրջանակից․ սա կարևոր հարթակ է մասնակիցների միջև շփումների ընդլայնման, ընկերական հարաբերությունների ձևավորման և համագործակցության ամրապնդման համար։ Նրա խոսքով՝ մրցապայքարում հաղթողներ և պարտվողներ չկան․ հաղթում են բոլորը, որովհետև ստեղծվում են սերտ կապեր և շփման նոր հնարավորություններ։