ԱՄՆ դատարանը Starbucks-ի օգտին որոշում է կայացրել արհմիությունների շուրջ վեճում

ԱՄՆ դաշնային վերաքննիչ դատարանը հրաժարվել է ուժի մեջ թողնել Աշխատանքային հարաբերությունների ազգային խորհրդի (NLRB) որոշման մեծ մասը, որով Starbucks-ը մեղադրվում էր արհմիություն ստեղծել փորձող աշխատակիցներին ապօրինի ճնշելու և նրանց գործունեությանը հետևելու տպավորություն ստեղծելու մեջ, հայտնում է Reuters-ը։

Դատարանը չի հաստատել այն պնդումները, որ Կանզաս նահանգի Ուիչիտա քաղաքի Starbucks-ի մասնաճյուղի ղեկավարները խախտել են աշխատանքային օրենսդրությունը՝ աշխատակիցներին հայտնելով, որ արհմիութենական ակտիվության պատճառով դադարեցրել են նոր աշխատողների ընդունումը և կրճատել աշխատանքային ժամերը։ Դատարանի գնահատմամբ՝ այդ հայտարարությունները չեն կարող համարվել պատժամիջոցների սպառնալիք։

Միևնույն ժամանակ դատարանն ուժի մեջ է թողել մեկ այլ դրվագով Starbucks-ի դեմ եզրակացությունը։ Ըստ դատարանի՝ ընկերությունն ապօրինի սպառնացել է հղի աշխատակցին, որ արհմիության ստեղծման դեպքում նա կարող է զրկվել մայրության արձակուրդի հետ կապված արտոնություններից։

Starbucks-ը ողջունել է դատարանի որոշումը՝ հայտարարելով, որ շարունակում է հարգել աշխատակիցների՝ օրենքով նախատեսված իրավունքները։ Reuters-ի տվյալներով՝ ԱՄՆ-ում Starbucks-ի ավելի քան 700 մասնաճյուղերի աշխատակիցներ քվեարկել են արհմիություններին միանալու օգտին։