Ատամնաբուժական կենտրոնի զուգարանակոնքի բաքում թմրանյութի նմանվող զանգվածներ են հայտնաբերվել

Սեպտեմբերի 4-ին «Նուբարաշեն» քրեակատարողական հիմնարկի դատապարտյալին ատամնաբուժական կենտրոն տեղափոխելու ընթացքում կանխվել է նրան թմրանյութի նմանվող զանգվածների փոխանցումը։

ՔԿ-ից հայտնում են, որ դատապարտյալը բժշկական կենտրոնում ցանկացել է օգտվել սանհանգույցից։ Զուգարան մուտք գործելուց առաջ ծառայողները ակնադիտական զննություն են իրականացրել և զուգարանակոնքի ջրի բաքի տեսանելի հատվածում հայտնաբերել սպիտակ կպչուն ժապավենով ամրացված սև փաթեթ՝ երկու առանձին փաթեթներով։

Դրանցից մեկում հայտնաբերվել է թմրանյութի նմանվող դեղնականաչավուն զանգված՝ 4.9 գրամ քաշով, իսկ մյուսում՝ սպիտակ, բյուրեղանման զանգված՝ 1.9 գրամ քաշով։

Դեպքի առթիվ նախապատրաստված նյութերն ուղարկվել են ՀՀ Քննչական կոմիտեի Էրեբունի և Նուբարաշեն վարչական շրջանների քննչական բաժին՝ քրեական վարույթ նախաձեռնելու հարցը քննարկելու նպատակով։