Ռուս նավապետը Ֆինլանդիայի դատարանում հերքել է ստորջրյա մալուխները վնասելու մեղադրանքները

Fitburg բեռնատար նավի ռուս նավապետը Հելսինկիի շրջանային դատարանում հերքել է Ֆիննական ծոցում ստորջրյա մալուխները վնասելու վերաբերյալ իրեն առաջադրված մեղադրանքները։ Այս մասին հայտնում է ֆիննական Yle հեռուստառադիոընկերությունը։

Ֆինլանդիայի դատախազությունը նավապետին և անձնակազմի՝ Ադրբեջանի քաղաքացի հանդիսացող բոցմանին մեղադրում է 2025 թվականի դեկտեմբերին Ֆիննական ծոցում մալուխները վնասելու մեջ։ Դատախազությունը ռուս նավապետի համար պահանջել է առնվազն 2,5 տարվա ազատազրկում։ Նավապետը պնդում է, որ նավահանգստից դուրս գալուց առաջ կամ նավարկության ընթացքում որևէ դիտավորյալ կամ անզգույշ գործողություն չի կատարել։ Բոցմանը ևս հերքել է իրեն առաջադրված մեղադրանքները։

Նավապետի փաստաբանը հայտարարել է, որ Ֆինլանդիան իրավասու չէ քննելու այս գործը՝ պնդելով, որ ծովային իրավունքի համաձայն այն պետք է քննվի կամ նավի դրոշի պետությունում, կամ մեղադրյալի քաղաքացիության երկրում։

Fitburg-ը, որը նավարկում է Սենթ Վինսենթ և Գրենադինների դրոշի ներքո, Ֆինլանդիայի իշխանությունները ձերբակալել էին 2025 թվականի դեկտեմբերին՝ ստորջրյա մալուխի ենթադրյալ վնասման կապակցությամբ։ Նավը հունվարին լքել էր Ֆինլանդիան, սակայն անձնակազմի երեք ռուս անդամների նկատմամբ շարունակում է գործել երկրից դուրս գալու արգելք։