«Չաղ Ռուստամի» և Աշոտ Կյուրեղյանի կալանքը երկարաձգվել է․ 24 News

Երևանի առաջին ատյանի ընդհանուր իրավասության քրեական դատարանի Մասիվի նստավայրում շարունակվել է Ռուստամ Ստեփանյանի («Չաղ Ռուստամ») և Աշոտ Կյուրեղյանի գործով դատական նիստը․ փոխանցում է 24 News-ը։

Դատարանը քննարկել է մեղադրյալների նկատմամբ կիրառված խափանման միջոցի հարցը։ Դատախազը նշել է, որ շարունակում են բարձր գնահատվել վկայի նկատմամբ ազդեցություն գործադրելու և այլ հանցանք կատարելու ռիսկերը և առաջարկել է կալանքը երկարաձգել երկու ամսով։

Պաշտպանները պնդել են, որ իրենց պաշտպանյալներն անմեղ են, չեն խոչընդոտել քննությանը և չեն փորձել խուսափել արդարադատությունից։ Ռուստամ Ստեփանյանի պաշտպան Գեղամ Հակոբյանը նշել է, որ գործի նյութերն արդեն հետազոտվել են, իսկ մնացած մեկ վկան գտնվում է Ռուսաստանում։

Դատարանի որոշմամբ՝ Ռուստամ Ստեփանյանի և Աշոտ Կյուրեղյանի կալանքը երկարաձգվել է 21 օրով։ Հաջորդ նիստը նշանակվել է մայիսի 28-ին։

Ըստ մեղադրանքի՝ Ռուստամ Ստեփանյանը Աշոտ Կյուրեղյանի և ևս երկու անձի հետ նախնական համաձայնությամբ ձեռք է բերել և պահել զենք ու ռազմամթերք, ապա կազմակերպել ու ղեկավարել Սերգեյ Գրիգորյանի («Ֆազ») սպանությունը։ Սերգեյ Գրիգորյանը սպանվել էր 2024 թվականի հունիսի 11-ին։