Ատոմակայանը Հայաստանի սեփականությունն է. ԱԷԿ-ի տնօրենը` Ադրբեջանից հնչեցրած մտահոգությունների մասին

«Հայկական ատոմային էլեկտրակայան» ՓԲԸ գլխավոր տնօրեն Էդուարդ Մարտիրոսյանը լրագրողների հետ զրույցում մեկնաբանել է ԱԷԿ-ի անվտանգության վերաբերյալ Ադրբեջանի հնչեցրած մտահոգությունները:

Սեպտեմբերի 9-ին NEWS.am-ի թղթակցի հարցին պատասխանելիս «Հայկական ատոմային էլեկտրակայան» ՓԲԸ գլխավոր տնօրեն Էդուարդ Մարտիրոսյանը հայտարարել է, որ ինքն է կայանի համար պատասխանատու առաջին անձը, և ոչ ոք իրենից շատ չպետք է մտահոգվի Հայկական ԱԷԿ-ի մասին։ Նա շեշտել է, որ ատոմակայանը Հայաստանի սեփականությունն է, և պետությունը պարտավոր է պատշաճ հոգ տանել դրա մասին։ Ղեկավարը կոչ է արել մատնանշել գոնե մեկ այլ ԱԷԿ, որտեղ 153 օրվա դադարի ընթացքում իրականացված լինեին 20 ակտիվ միջոցառումներ, ինչպես արվել է Հայաստանում։

«Ոչ ոք նման կարճ ժամանակահատվածում այսքան արդիականացում չի իրականացրել։ Վերջերս եվրոպական կայաններից մեկը հայտարարեց, որ արդիականացման համար 6 տարի է պահանջվել։ Նայեք, թե ինչ հսկայական, գրեթե հերոսական աշխատանք ենք կատարել։ Չեմ ուզում որևէ մեկին գովաբանել, բայց արված աշխատանքը կգնահատեն Ատոմային էներգիայի միջազգային գործակալության (ԱԷՄԳ) մասնագետները, որոնք պարբերաբար այցելում են կայան»,- նշել է նա։