Թրամփը Իրանի հետ պատերազմի ավարտը կապել է ԱՄՆ ընտրությունների հետ և նոր հարվածով սպառնացել Թեհրանին

ԱՄՆ նախագահ Դոնալդ Թրամփը հայտարարել է, որ Իրանի հետ պատերազմը, իր գնահատմամբ, կարող է ավարտվել նոյեմբերին կայանալիք ԱՄՆ միջանկյալ ընտրություններից անմիջապես հետո։ Նա Թեհրանին նաև սպառնացել է հարվածել Իրանի միջուկային ծրագրի հետ կապվող «Փիքաքս» լեռան ստորգետնյա համալիրին, հայտնում է Reuters-ը։

Թրամփի պնդմամբ՝ Թեհրանը փորձում է պատերազմի միջոցով ազդել ԱՄՆ ընտրությունների արդյունքների վրա։ «Կարծում եմ՝ պատերազմը կավարտվի ընտրություններից անմիջապես հետո, քանի որ նրանք այլևս չեն կարող դիմանալ»,- լրագրողներին ասել է ԱՄՆ նախագահը։ Միաժամանակ նա զգուշացրել է, որ «Փիքաքս» լեռան շրջանում ակտիվության շարունակման դեպքում ԱՄՆ-ը կարող է «շատ ուժեղ հարված» հասցնել։

Լարվածությունը տարածաշրջանում շարունակում է աճել։ Իրանը հայտարարել է Հորմուզի նեղուցի մոտ 10 նավի վրա հարձակման մասին՝ այն բանից հետո, երբ ԱՄՆ-ը խորտակել էր իրանական հինգ նավթատար։ Նեղուցով նավագնացությունը կտրուկ նվազել է, իսկ Brent տեսակի նավթի գինը պահպանվում է մեկ բարելի դիմաց 100 դոլարից բարձր մակարդակում։

Միաժամանակ սրվել են նաև Սաուդյան Արաբիայի և Եմենի հութիների միջև բախումները։ Վերջին հարձակումների հետևանքով Սաուդյան Արաբիայի հարավային քաղաքներում, ըստ սաուդյան կողմի, առնվազն 73 մարդ է վիրավորվել։ Հութիները հայտարարել են ավիաբազայի և նավթային ենթակառուցվածքների վրա հարվածների մասին։