Թրամփը խոստացել է յուրաքանչյուր չափահաս ամերիկացու 5 հազար դոլար՝ հանրապետականների հաղթանակի դեպքում

ԱՄՆ նախագահ Դոնալդ Թրամփը հայտարարել է, որ նոյեմբերին կայանալիք միջանկյալ ընտրություններում հանրապետականների հաղթանակի դեպքում յուրաքանչյուր չափահաս ամերիկացու կտրամադրվի 5 հազար դոլարի «Թրամփի դիվիդենդ»։ Այս մասին նա հայտարարել է Դալասում Հանրապետական կուսակցության համագումարի ժամանակ, հայտնում է Reuters-ը։

Առայժմ պարզ չէ, թե ինչպես է նախատեսվում իրականացնել ծրագիրը և արդյոք այն իրավական առումով հնարավոր կլինի կյանքի կոչել։ ԱՄՆ-ում մոտ 270 մլն չափահաս բնակչի հաշվարկով նախաձեռնության ընդհանուր արժեքը կարող է հասնել մոտ 1,35 տրլն դոլարի։

Թրամփը ընտրողներին կոչ է արել միջանկյալ ընտրություններում աջակցել հանրապետականներին՝ նույնիսկ առաջարկելով «պատկերացնել, թե ինքն է քվեաթերթիկում»։ Նախագահը նաև հայտարարել է, որ մինչև նոյեմբերի 3-ի ընտրությունները պատրաստվում է ակտիվ քարոզարշավ անցկացնել վճռորոշ նահանգներում և ընտրատարածքներում։

Reuters-ը նշում է, որ առաջարկը հնչել է Թրամփի վարկանիշի անկման, կյանքի թանկացման և Իրանի հետ շարունակվող պատերազմի պատճառով աճող դժգոհության ֆոնին։ Միաժամանակ դեռ հայտնի չէ, թե 5 հազար դոլարի վճարման առաջարկը կոնկրետ ինչ աղբյուրներից է ֆինանսավորվելու և ինչ պայմաններով կարող է իրականացվել։