553 մլն դրամի թերհայտարարագրված շրջանառություն՝ Քոչարյանի հետ կապված ընկերությունում (տեսանյութ)

ՊԵԿ-ը հանրային սննդի և զվարճանքների կազմակերպման ոլորտում գործող ընկերություններից մեկի գործունեության ուսումնասիրությամբ բացահայտել է շուրջ 553 մլն դրամի թերհայտարարագրված շրջանառություն։ Նախնական տվյալներով զվարճանքի կենտրոնը պատկանում է Ռոբերտ Քոչարյանի ընտանիքին և հայտնի է որպես Play City:

ՊԵԿ-ի հաղորդմամբ՝ ընկերության կողմից մատուցված ծառայությունների մի մասի դիմաց վճարումներն ընդունվել են կանխիկ՝ առանց ՀԴՄ կտրոնների տրամադրման, իսկ գործարքները չեն ներառվել հարկային հաշվարկներում։ Ուսումնասիրության արդյունքում պարզվել է, որ 2025-2026 թվականներին ընկերության իրացման շրջանառությունը հարկային հաշվարկներում պակաս է արտացոլվել շուրջ 553 մլն դրամով։

Դրա հետևանքով պետական բյուջեին պատճառված վնասը կազմել է շուրջ 141 մլն դրամ։

Փաստերի հիման վրա հաղորդում է ներկայացվել Քննչական կոմիտե, որի հիման վրա նախաձեռնվել է քրեական վարույթ և իրականացվել անհետաձգելի քննչական գործողություններ։

ՊԵԿ-ը հիշեցնում է, որ ենթադրյալ հանցանքի համար կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ դատարանի՝ օրինական ուժի մեջ մտած դատավճռով։

Հիշեցնենք նաև, որ 2026-ի օգոստոսի 25-ին Քոչարյանների գործի շրջանակում խուզարկություն էր կատարվում Play City-ում և Orange Fitness-ում, իսկ ՔԿ-ն դրանք կապել էր Քոչարյանների ընտանիքի հետ։