ԱՄՆ զինվորականների գնահատականները Իրանի հետ պատերազմի վերաբերյալ տարբերվել են Սպիտակ տան հայտարարություններից

ԱՄՆ փոխնախագահ Ջեյ Դի Վենսը գարնանն ու ամռանը անմիջականորեն կապ է հաստատել Մերձավոր Արևելքում, Եվրոպայում և Ասիայում ամերիկյան ուժերի հրամանատարների հետ՝ Իրանի դեմ պատերազմի իրական ընթացքի վերաբերյալ գնահատականներ ստանալու համար։ The New York Times-ի տվյալներով՝ զինվորականների ներկայացրած պատկերը զգալիորեն ավելի մտահոգիչ է եղել, քան այն, ինչ հրապարակայնորեն ներկայացնում էր Դոնալդ Թրամփի վարչակազմը։

Հրամանատարների հիմնական մտահոգություններից մեկը սպառազինության պաշարների կրճատումն էր։ Ըստ պարբերականի աղբյուրների՝ գարնան վերջին ռազմաճակատի ուղղություններից մեկում մնացել էր Patriot համակարգերի 100-ից պակաս հակահրթիռ, իսկ ATACMS և Precision Strike Missile հրթիռների պաշարները սպառվել էին։ Որոշ կարևոր զինատեսակների պաշարները հասել էին զինվորականների արձանագրած նվազագույն մակարդակին։

NYT-ի փոխանցմամբ՝ ստացված տեղեկություններից հետո Վենսի մոտ լուրջ կասկածներ են առաջացել պատերազմի ռազմավարության և հեռանկարների վերաբերյալ։ Զինվորականների գնահատականները նաև ցույց են տվել, որ Իրանը կարողացել է ավելի երկար դիմակայել հարվածներին, քան սկզբում ակնկալում էր Վաշինգտոնը։ Թրամփը ևս ստացել է նման տեղեկություններ, սակայն, պարբերականի աղբյուրների համաձայն, սկզբնական շրջանում դժվարությամբ է հավատացել այդ գնահատականներին։

Ապրիլին Թրամփը թույլատրել է Վենսին, Ջարեդ Քուշներին և հատուկ բանագնաց Սթիվ Ուիթքոֆին բանակցություններ վարել Թեհրանի հետ։ Հունիսին կողմերը փոխըմբռնման հուշագիր են ստորագրել՝ համաձայնության հասնելու համար նախատեսելով 60-օրյա ժամկետ, սակայն օգոստոսին այն ավարտվել է առանց նոր պայմանավորվածության։