ԱՄՆ ֆոնդային շուկան պայթյունի շեմի՞ն է․ տնտեսագետը զգուշացրել է առաջիկա ամիսների վտանգի մասին

ԱՄՆ ֆոնդային շուկայում ձևավորված «փուչիկը» կարող է պայթել արդեն առաջիկա ամիսներին։ Այս մասին, ինչպես հաղորդում է ռուսական «ՌԻԱ Նովոստի»-ն՝ հղում անելով ավստրալական ABC հեռուստաալիքին, հայտարարել է Capital Economics-ի ֆինանսական շուկաների ավագ տնտեսագետ Ջեյմս Ռեյլին։

Վերլուծաբանների մտահոգությունն ուժեղացել է նավթի գների և ԱՄՆ պետական պարտատոմսերի եկամտաբերության կտրուկ աճի ֆոնին։ ԱՄՆ 10-ամյա գանձապետական պարտատոմսերի եկամտաբերությունը մոտեցել է 5%-ի՝ հասնելով գրեթե երեք տարվա առավելագույնին, իսկ Brent տեսակի նավթի գինը բարձրացել է գրեթե մինչև 110 դոլար մեկ բարելի դիմաց։

Ռեյլիի գնահատմամբ՝ ութ ցուցանիշ վկայում է, որ S&P 500 ինդեքսում «փուչիկի» ձևավորումն արդեն միջին կամ ուշ փուլում է։ Դրանց թվում են խոշոր տեխնոլոգիական ընկերությունների՝ փոխառու միջոցներով ֆինանսավորվող ներդրումների կտրուկ աճը, ինչպես նաև բարձր գնահատումների պայմաններում ընկերությունների՝ բորսա դուրս գալու և բաժնետոմսերի տեղաբաշխումների թվի ավելացումը։ Տնտեսագետի խոսքով՝ նախկին փորձը ցույց է տալիս, որ նման իրավիճակում «փուչիկի» ավարտին կարող են մնացած լինել ոչ թե տարիներ, այլ ամիսներ։