Կոնգրեսական․ Հայաստանը և Ադրբեջանը կարող են խաղաղության համաձայնագիր ստորագրել մինչև Թրամփի նախագահական ժամկետի ավարտը

ԱՄՆ Կոնգրեսի անդամ Աբրահամ Համադեն հայտնել է, որ Հայաստանի և Ադրբեջանի միջև խաղաղության գործընթացն ավելի արագ է առաջ ընթանում, քան շատերը սպասում էին, և կանխատեսել է, որ վերջնական խաղաղության համաձայնագիրը կարող է ձեռք բերվել Դոնալդ Թրամփի ներկայիս նախագահական ժամկետի ավարտից շատ առաջ։

«Ազատություն» ռադիոկայանի հարցազրույցում Համադեն TRIPP-ը բնութագրել է որպես ավելին, քան պարզապես տնտեսական նախագիծ՝ պնդելով, որ այն կարող է քաղաքական և տնտեսական առումով համախմբել Հայաստանն ու Ադրբեջանը՝ միաժամանակ բացելով Հարավային Կովկասն արևմտյան առևտրի և ներդրումների ընդլայնման համար։

«Թե՛ Բաքվում, թե՛ Երևանում ամեն ինչ շատ հարթ է ընթանում, և երկու կողմերն էլ վճռական են ապահովելու Հարավային Կովկասի խաղաղությունն ու բարգավաճումը», — նշել է նա։

Միաժամանակ, նա ընդունել է, որ որոշ խնդիրներ դեռ մնում են։ «Կան կալանավորվածներ, որոնց հայերը կցանկանային վերադարձնել Ադրբեջանից։ Ես կարծում եմ, որ հարաբերությունների ամրապնդումը կօգնի ոչ միայն Ադրբեջանի և Հայաստանի, այլև Թուրքիայի և Հայաստանի միջև հարաբերություններին, ինչին վերջին շրջանում անբավարար ուշադրություն է դարձվում։ Երկու կողմերը համաձայնել են բացել իրենց սահմանները՝ սկսելով դեռ 2022 թվականին դիվանագիտական շփումներով սահմանին։ Դա մինչ այժմ չի իրականացվել։ Մենք հույս ունենք, որ նրանց սահմանը կբացվի, որպեսզի Հայաստանը, բացի Ռուսաստանից, Վրաստանից կամ Իրանից, ունենա առևտրի ևս մեկ ուղի։ Հետևաբար, մենք պետք է ապահովենք Թուրքիայի սահմանի բացումը Հայաստանի հետ»։

«Ռուսաստանի ազդեցությունը Հայաստանի վրա ավելի ուժեղ է, քան, ասենք, Կովկասի այլ երկրների վրա, և ռուսներին վստահել չի կարելի։ Իսկ հիմա նրանք շատ տարված են Ուկրաինայում պատերազմով... և հասկանում են, որ այժմ Միացյալ Նահանգները լրացնում է հսկայական վակուումը», — նշել է Համադեն։