Վաշինգտոնից մինչև Նյու-Հեյվեն․ ԱՄՆ-ի 39 մլն բնակիչ հայտնվել է ջրհեղեղների սպառնալիքի գոտում

ԱՄՆ-ի հյուսիս-արևելքի շուրջ 39 մլն բնակիչ հայտնվել է ջրհեղեղների սպառնալիքի գոտում՝ հզոր ամպրոպային գծի պատճառով, որը կիրակի գիշերը ձևավորվել է Վաշինգտոնից մինչև Կոնեկտիկուտ նահանգի Նյու-Հեյվեն քաղաքը, հաղորդում է NBC News-ը։

ԱՄՆ-ի Ազգային օդերևութաբանական ծառայությունը բազմաթիվ նախազգուշացումներ և ջրհեղեղների սպառնալիքի մասին հաղորդագրություններ է հրապարակել Մերիլենդի, Փենսիլվանիայի, Դելավերի և Նյու Ջերսիի որոշ հատվածների համար։

Նյու Յորքի արտակարգ իրավիճակների կառավարման ծառայությունը քաղաքի բնակիչներին նախազգուշացրել է կիրակի գիշերը սպասվող հորդառատ անձրևների և հնարավոր հանկարծակի ջրհեղեղների մասին։ Քաղաքում բացվել է 51 ժամանակավոր կացարան՝ ջրհեղեղներից հատկապես խոցելի մարդկանց համար, այդ թվում՝ նկուղային և կիսանկուղային բնակարանների բնակիչների համար։

Նյու Յորքում ջրհեղեղների սպառնալիքի նախազգուշացումը պետք է ուժի մեջ մտներ կիրակի առավոտյան ժամը չորսին և գործեր մինչև կեսօր։ Ֆիլադելֆիայում և հարևան շրջաններում նմանատիպ նախազգուշացումը պահպանվել է առավոտվա ընթացքում։ Վաշինգտոնի համար նախազգուշացումն ավարտվել է գիշերվա ժամը մեկին։

Նյու Յորքի քաղաքային իշխանությունների տվյալներով, Նասաու և Սաֆոլք շրջաններում, ինչպես նաև Կոնեկտիկուտի հարավում տեղումների քանակը կարող է հասնել 5–7 դյույմի՝ մոտ 127–178 մմ։ Հորդառատ անձրևներ կարող են տեղալ նաև Նյու Յորքի արևելյան շրջաններում։

Իշխանությունները նախազգուշացրել են նաև Բրուքլինի և Քուինսի արևելյան շրջանների բնակիչներին հանկարծակի ջրհեղեղների բարձր վտանգի մասին։ Նրանց գնահատմամբ, առավել ինտենսիվ տեղումների գոտու փոքր տեղաշարժը կարող է հանգեցնել 5–7 դյույմ անձրևային տեղումների և զգալիորեն մեծացնել ողողումների վտանգը։ Նկուղային և գետնի մակարդակից ցածր տեղակայված տարածքների բնակիչներին խորհուրդ է տրվել այս գիշեր տեղափոխվել ավելի բարձր վայրեր։

Հարավային Կոնեկտիկուտի որոշ շրջաններում, ներառյալ Նյու-Հեյվեն շրջանի հյուսիսային մասը, ջրհեղեղների սպառնալիքի նախազգուշացումը գործել է մինչև կիրակի։

Ամպրոպները ձևավորվել են մթնոլորտի վերին շերտերում սառը օդի զանգվածի դեպի արևելք տեղաշարժի և դրա՝ ավելի տաք օդի հետ բախման հետևանքով։ Ազգային օդերևութաբանական ծառայության կանխատեսմամբ, մթնոլորտային անկայունության, խոնավության մեծ քանակի և այլ գործոնների համակցությունը կարող է հանգեցնել ծայրահեղ տեղումների և ուժեղ ամպրոպների սպառնալիքի։