Հնարավոր է՝ Ռուսաստանը մտավախություններ ունի Հայաստանում տեղակայված ռազմաբազայի առնչությամբ․ Նազելի Բաղդասարյան

Ինչո՞ւ է Ռուսաստանը պարբերաբար բարձրացնում Հայաստանում ռազմաբազայի հարցը։ Գուցե նրանք որոշակի մտավախություններ ունեն։ Սեպտեմբերի 15-ին լրագրողների հետ զրույցում այս մասին հայտարարել է իշխող «Քաղաքացիական պայմանագիր» խմբակցության պատգամավոր Նազելի Բաղդասարյանը։

Նա չի բացառել, որ այս թեման Հայաստանում թեժացնում են ընդդիմադիր գործիչները։ Պատգամավորը հավելել է, որ ռուսական ռազմաբազայի հարցը կարգավորվում է պայմանագրերի հիման վրա։ «Այս պահին գնդակը Ռուսաստանի դաշտում է։ Եթե հնչում են հրապարակային հայտարարություններ, ապա պետք է հետևել հետագա քայլերին»,- նշել է Բաղդասարյանը։

Պատգամավորը վստահեցրել է, որ Հայաստանի և ոչ մի քաղաքացի չի կարող իրեն անտեր զգալ, որովհետև հենց քաղաքացին է երկրի տերը։ Բաղդասարյանը ցավալի է համարել ընդդիմադիր «Ուժեղ Հայաստան» ուժի ղեկավար Սամվել Կարապետյանի ձևակերպումները։ «Հասկանում եմ, թե նա ինչ օրակարգ է սպասարկում․ թերևս տերերի դեֆիցիտ հենց իրենք ունեն, իսկ քաղաքացիները նման զգացողություն երբեք չեն ունենա»,- եզրափակել է նա։