Լոս Անջելեսում լրատվական ուղղաթիռ է կործանվել․ երեք մարդ զոհվել է

Լոս Անջելեսում լրատվական ուղղաթիռի կործանման հետևանքով երեք մարդ է զոհվել, ևս առնվազն երկուսը՝ վիրավորվել։ Այս մասին հայտնում է CNN-ը՝ հղում անելով տեղի իշխանություններին։

Ուղղաթիռը սպասարկում էր NBC4 և Telemundo 52 հեռուստաալիքներին և օդից լուսաբանում էր Չաթսվորթ շրջանում տեղի ունեցած մահացու ավտոբուսային վթարը։ Կործանված ուղղաթիռում եղել են փորձառու օդաչու Ջորջ Մարչինիվը և օդային նկարահանումների լրագրող Էլիանա Մորենոն։ Նրանք երկուսն էլ զոհվել են։ Երրորդ զոհը եղել է ավտոկայանատեղիում գտնվող հետիոտնը։

Վթարից հետո հրդեհ է բռնկվել, վնասվել են չորս ավտոմեքենա և երկու բեռնային կոնտեյներ։ Դեպքի վայրում աշխատել է ավելի քան 70 հրշեջ։ Հրդեհն ավելի ուշ մարվել է։

Ուղղաթիռի կործանման պատճառը դեռ հայտնի չէ։ Դեպքի հետաքննությունը ղեկավարում է ԱՄՆ Տրանսպորտային անվտանգության ազգային խորհուրդը (NTSB), գործընթացին ներգրավված է նաև Դաշնային ավիացիոն վարչությունը (FAA)։ Նախնական տվյալներով՝ կործանված օդանավը 2004 թվականին արտադրված Eurocopter AS350 B2 ուղղաթիռ էր։