ԱՄՆ-ը պատրաստվում է Իսրայելին 2,8 մլրդ դոլարի խոշոր ավիառումբերի խմբաքանակ վաճառել

Դոնալդ Թրամփի վարչակազմը պատրաստվում է Իսրայելին վաճառել 2,8 միլիարդ դոլար արժողությամբ սպառազինության փաթեթ, որը ներառում է 907 կիլոգրամանոց՝ 2000 ֆունտ կշռող ավիառումբեր։ Այս մասին հայտնում է Al Jazeera-ն՝ հղում անելով The Washington Post-ին և AFP-ին։

Ըստ հրապարակման՝ փաթեթը ներառում է ընդհանուր առմամբ 40 հազար ռումբ՝ 20 հազար MK-84 և նույնքան BLU-117, ինչպես նաև I-2000 Penetrator մարտագլխիկներ, որոնք նախատեսված են ամրացված և ստորգետնյա կառույցների խոցման համար։ Գործարքը նախատեսվում է ֆինանսավորել ԱՄՆ-ի Foreign Military Financing ծրագրի միջոցով, որով Վաշինգտոնը միջոցներ է տրամադրում Իսրայելին՝ ամերիկյան սպառազինություն գնելու համար։

Գործարքի մասին ոչ պաշտոնապես տեղեկացվել են ԱՄՆ Կոնգրեսի համապատասխան հանձնաժողովները։ Պետդեպարտամենտը հայտարարել է, որ մինչև Կոնգրեսին պաշտոնական ծանուցումը չի մեկնաբանում սպառազինության հնարավոր վաճառքները։

Նախաձեռնությունն արդեն քննադատության է արժանացել ԱՄՆ-ում՝ հատկապես Գազայում քաղաքացիական բնակչության շրջանում զոհերի վերաբերյալ մտահոգությունների ֆոնին։ Սենատոր Քրիս Վան Հոլենը հայտարարել է, որ կփորձի արգելափակել գործարքը։ 2024 թվականին Ջո Բայդենի վարչակազմը ժամանակավորապես կասեցրել էր նմանատիպ 2000 ֆունտանոց ռումբերի մեկ խմբաքանակի մատակարարումը՝ քաղաքացիական զոհերի վտանգի պատճառով, սակայն Թրամփը պաշտոնը ստանձնելուց հետո վերացրել էր այդ սահմանափակումը։