Արջը պատուհանից մտել է 17-ամյա աղջկա ննջասենյակ և հարձակվել նրա վրա

ԱՄՆ Կոլորադո նահանգում 17-ամյա աղջիկը փրկվել է արջի հարձակումից, որը գիշերը պատուհանից ներխուժել է նրա ննջասենյակ։ Միջադեպը տեղի է ունեցել սեպտեմբերի 13-ին՝ մոտավորապես գիշերվա ժամը 02:00-ին, Դուրանգո քաղաքում, հայտնում է KOB 4-ը։

Աղջկա պատմելով՝ սև արջը պատռել է պատուհանի ցանցը, բացել կիսաբաց պատուհանն ու մտել սենյակ։ Նա թաքնվել է վերմակների տակ, մինչ կենդանին հոտոտել է նրա գլուխը։ Երբ աղջիկը ձայն է հանել, արջը թաթով հարվածել է նրա որովայնին։ Դեռահասը սկսել է բարձրաձայն գոռալ, ինչից հետո կենդանին շրջվել և դուրս է եկել սենյակից։

Աղջիկը ստացել է երեք քերծվածք և հարվածի հետևանքով կապտուկ։ Վայրի բնության պահպանության ծառայության աշխատակիցների խոսքով՝ մի քանի շերտ վերմակները մեղմել են հարվածը։ Մասնագետները թակարդ են տեղադրել արջին բռնելու համար և հայտնել, որ նույն կենդանին ավելի վաղ մտել էր նաև մոտակայքում գտնվող մեկ այլ տուն։