ԱՄՆ-ում նոր պատժամիջոցների շուրջ քվեարկությունից հետո ռուսական ֆոնդային շուկան անկում է գրանցել

Սեպտեմբերի 17-ին ռուսական բաժնետոմսերի շուկայում անկում է գրանցվել այն բանից հետո, երբ ԱՄՆ Ներկայացուցիչների պալատը հավանություն է տվել Ռուսաստանի և նրա էներգակիրների գնորդների նկատմամբ պատժամիջոցների խստացում նախատեսող օրինագծին։ Առևտրային տվյալներով՝ Մոսկվայի բորսայի ինդեքսը նվազել է շուրջ 2%-ով՝ հասնելով 2239,97 կետի։

Շաբաթվա սկզբին ինդեքսը բարձրացել էր 2370 կետից ավելի։ Անկման ֆոնին Մոսկվայի բորսայի սեփական բաժնետոմսերն էժանացել են մոտ 3%-ով, իսկ ՎՏԲ բանկի արժեթղթերի գինը նվազել է մինչև 49,44 ռուբլի՝ հասնելով պատմական նվազագույնի։ «Финам»-ի գնահատմամբ՝ շուկայի բացասական դինամիկայի հիմնական գործոններից են աշխարհաքաղաքական ռիսկերը։

Նյութի համաձայն՝ ԱՄՆ-ում քննարկվող պատժամիջոցները նախատեսում են մինչև 500% մաքսատուրքեր ԱՄՆ ներմուծվող ռուսական ապրանքների նկատմամբ և 100% մաքսատուրքեր այն երկրներից ներմուծվող ապրանքների համար, որոնք շարունակում են ռուսական նավթ կամ գազ գնել։ Ռուսաստանի նախագահի մամուլի քարտուղար Դմիտրի Պեսկովը հայտարարել է, որ նման սահմանափակումները, Մոսկվայի գնահատմամբ, կարող են բարդացնել Ուկրաինայի հակամարտության խաղաղ կարգավորմանն ուղղված ջանքերը։