Սկսում է ինձ հետ խաղեր տալ. Յուրի Խաչատուրովը մանրամասներ է պատմել իր ձերբակալությունից

Գեներալ Յուրի Խաչատուրովը սեպտեմբերի 18-ի դատական նիստում պատմել է իր ձերբակալության հանգամանքները՝ ՀԱՊԿ գլխավոր քարտուղար եղած ժամանակ։

Յուրի Խաչատուրովը պատմել է, թե իրականում ինչ է եղել։ Նա հայտնել է, որ գտնվում էր իր աշխատասենյակում՝ Մոսկվայում, երբ զանգ է ստացել քննիչից։ Վերջինս խնդրել է ներկայանալ որպես վկա։ «Ես ասացի՝ «լավ, կգամ, եթե պետք է»։ Պատվիրեցի տոմս, մեկ-երկու օր հետո թռա, եկա քննիչ Մուշեղյանի մոտ։ Նա ժպտում է։ Սկսում է ինձ հետ խաղեր տալ, խոսում է։ Հանցագործության վերաբերյալ ոչ մի հարց», - պատմել է Խաչատուրովը։

Հետո հանկարծ գեներալին ասում են, որ իրեն ձերբակալում են։ «Մի քանի ժամ անց դատարանն ինձ կալանավորեց։ Հետո երկար էին խորհրդակցում։ Երևի չէին ուզում շատ փչացնել հարաբերությունները ՀԱՊԿ-ի հետ։ Ազատ արձակեցին գրավի դիմաց։ Մինչ օրս գրավը հետ չեմ ստացել», - շարունակել է Խաչատուրովը։ Գեներալը հավելել է, որ պատրաստ է գրավը թողնել դատարանին՝ աթոռների վերանորոգման համար։ Աթոռները բանի պետք չեն, նկատել է նա։

Գրավը վճարելուց հետո գեներալը թույլտվություն է խնդրել մեկնել Մոսկվա, քանի որ զբաղեցնում էր ՀԱՊԿ գլխավոր քարտուղարի պաշտոնը։ Նրան թույլ են տվել, և մինչև նոյեմբեր նա աշխատել է այդ պաշտոնում, մեկնել գործուղումների, նույնիսկ Նյու Յորք։

«Հետո կանչեցին, եկա այստեղ և մինչ օրս դատարաններում եմ։ Չգիտեմ՝ ինչու։ Զեկույցն ավարտված է», - եզրափակել է գեներալը։

Հիշեցնենք, որ նրա փաստաբանը միջնորդություն էր ներկայացրել քրեական հետապնդումը դադարեցնելու վերաբերյալ՝ կապված այն հանգամանքի հետ, որ ժամանակին չէր հաղթահարվել նրա միջազգային դիվանագիտական անձեռնմխելիությունը։