ԱՄՆ-ում 74-ամյա որսորդը կնոջ է սպանել՝ նրան եղջերուի տեղ դնելով

ԱՄՆ-ի Դելավեր նահանգում 74-ամյա տղամարդուն մեղադրանք է առաջադրվել այն բանից հետո, երբ նա որսի ժամանակ մահացու կրակոց էր արձակել կնոջ ուղղությամբ, հայտնում է NBC News-ը։

Նահանգի ոստիկանության տվյալներով՝ տղամարդը հայտարարել է, որ նրան եղջերուի տեղ է դրել։

Մերիլենդ նահանգի Սոլսբերի քաղաքից Ուոլթեր Մուրհեդը ձերբակալվել է այն բանից հետո, երբ ուրբաթ երեկոյան ոստիկանությունը հաղորդում է ստացել Էլենդեյլ քաղաքում բաց դաշտում հրազենային վիրավորում ստացած կնոջ մասին։

Ոստիկանները տուժածին առաջին օգնություն են ցուցաբերել, որից հետո նրան տեղափոխել են հիվանդանոց, որտեղ նա մահացել է։ Կիրակի օրը ոստիկանությունը հայտնել է զոհվածի ինքնությունը՝ Դելավեր նահանգի Ջորջթաուն քաղաքից 39-ամյա Սանտոս Մարիա Չիլել Սոտո։

Քննության տվյալներով, Չիլել Սոտոն դաշտում գտնվել է մի տղամարդու և երկու երեխաների հետ, երբ Մուրհեդը կրակ է բացել։ Ոստիկանության վարկածով, նա որս էր անում քողարկված ապաստարանից և կարծել էր, թե եղջերու է նկատել։ Դրանից հետո տղամարդը հրացանից կրակել է՝ դիպչելով կնոջը։

Մուրհեդին մեղադրանք է առաջադրվել անզգուշությամբ սպանության, անփութությամբ վտանգ ստեղծելու և ծանր հանցագործություն կատարելու ընթացքում հրազեն ապօրինի կիրառելու համար։

Ձերբակալությունից հետո տղամարդուն ազատ են արձակել 43 հազար դոլար գումարի չափով գրավի դիմաց, հայտնել են ոստիկանությունում։

Ոստիկանությունը շարունակում է հետաքննել մահացու կրակոցի հանգամանքները։