«Կա՞ պետություն, որ առանց պետական սահմանների անկախ է»․ Սասուն Միքայելյանը՝ Անկախության օրը

Երևանի «Եռաբլուր» զինվորական պանթեոն այսօր իշխող «Քաղաքացիական պայմանագիր» կուսակցությունից այցելել են միայն Սասուն Միքայելյանն ու Անդրանիկ Քոչարյանը։ Նրանք ծաղիկներ են խոնարհել ՀՀ ազգային հերոս, սպարապետ Վազգեն Սարգսյանի շիրիմին։

Սասուն Միքայելյանը Անկախության օրվա առթիվ շնորհավորել է հայ ժողովրդին՝ նշելով, որ ցանկանում է, որպեսզի Հայաստանը վերջապես ունենա պետական սահմաններ և լիարժեք անկախություն։

«Ուզում եմ շնորհավորել հայ ժողովրդին Անկախության 35-ամյակի կապակցությամբ։ Տա Աստված՝ մենք վերջապես ունենանք պետական սահմաններ և լիովին անկախ լինենք։ Այն, ինչ ես արել եմ անկախության համար՝ ի սկզբանե 38 տարի շարունակ այս ռազմաքաղաքականության մեջ լինելով, հիմա էլ անում եմ։ Այն, ինչ արել եմ 90-ական թվականներին՝ Արցախի ազատագրումից մինչև այսօր»,- ասել է Միքայելյանը։

Նրա խոսքով՝ երկրապահներն ու ազատամարտիկները իրենց գործը կատարել են, իսկ «դեպի վերջնական հաղթանակ պետք է տանեն քաղաքական գործիչները»։

«20 թվականից մինչ այսօր մենք ուզում ենք հասնել սահմանազատման։ Կա՞ պետություն, որ առանց պետական սահմանների անկախ է, ես չգիտեմ։ Մենք ասում ենք՝ անկախ ենք, բայց կա՞ պետական սահման՝ միջազգայնորեն ճանաչված»,- ասել է նա։

Անդրադառնալով իր հայտարարությանը, թե այսօր Հայաստանը դեռևս չունի ամբողջությամբ սահմանազատված սահմաններ, Միքայելյանը նշել է, որ պետք է հիշել, թե որտեղից որտեղ են հասել հայոց սահմանները։

«Մենք այսօր կանգնած ենք այնտեղ, որտեղ սահմանազատում պետք է լինի, և պետք է կանգնենք այդ սահմաններին այնքան, մինչև սահմանազատում լինի։ Ոչ ոք չգիտի՝ ոնց են պահվել մեր սահմանները, իսկ ես գիտեմ՝ ինչ գնով։ Բայց չենք կարող ցեղասպանության տանել էս ժողովրդին։ Էդ ամենով պետք է զբաղվեին նախորդ քաղաքական գործիչները, ոչ թե ալան-թալանով զբաղվեին»,- ասել է Միքայելյանը։

Ավելի վաղ լրատվամիջոցները հայտնել էին, որ զոհված զինծառայողների հարազատները վաղ առավոտից հավաքվել են «Եռաբլուրում»՝ փորձելով թույլ չտալ երկրի բարձրագույն ղեկավարության մուտքը պանթեոն։