Վաղարշապատում կինոթատրոնի շենքի և հողամասի օտարման գործով քրեական վարույթ է նախաձեռնվել

Զինվորական կենտրոնական դատախազության պետական շահերի պաշտպանության բաժինն ուսումնասիրել է Վաղարշապատի Կոմիտասի հրապարակում գտնվող կինոթատրոնի շենքի և դրան կից հողամասի օտարման գործընթացի իրավաչափությունը։

Ուսումնասիրությամբ պարզվել է, որ 2004 թվականին Կառավարության որոշմամբ պետական սեփականություն հանդիսացող կինոթատրոնի շենքը թույլատրվել է ուղղակի վաճառքով օտարել ֆիզիկական անձի՝ 55 հազար ԱՄՆ դոլարին համարժեք դրամով, առանց սահմանված կարգով գույքի գնահատման արդյունքի։ Մինչդեռ օտարումից շուրջ երեք ամիս անց, առանց գույքի փաստացի վիճակի փոփոխության, դրա կադաստրային արժեքը կազմել է 218 մլն 215 հազար դրամ։

Պարզվել է նաև, որ առուվաճառքի պայմանագրով հողամասի վարձակալության իրավունքի փոխանցում նախատեսված չի եղել, սակայն պետական սեփականություն հանդիսացող 0,266 հա հողամասի նկատմամբ գրանցվել է ֆիզիկական անձի վարձակալության իրավունքը։ Հետագայում դա հիմք է հանդիսացել 18 մլն 513 հազար դրամ կադաստրային արժեքով հողամասի նկատմամբ անհատույց սեփականության իրավունք ձեռք բերելու համար։

Դատախազության փոխանցմամբ՝ հողամասի 1253 քմ հատվածը՝ մայթերն ու անցումները, գտնվել է Հողային օրենսգրքի 60-րդ հոդվածով սահմանված սահմանափակումների ներքո և ենթակա չի եղել օտարման։

Դատախազը առերևույթ հանցանքի հատկանիշներ հայտնաբերելուց հետո հանցանքի մասին հաղորդում է ներկայացրել Հակակոռուպցիոն կոմիտե, և նախաձեռնվել է քրեական վարույթ։

Միաժամանակ, դատախազությունը պետական շահերի պաշտպանության հայց է ներկայացրել դատարան, որն ընդունվել է վարույթ։