ՌԴ Դաշնության խորհրդում արձագանքել են Ռուսաստանի հետ պատերազմի մասին Լը Պենի հայտարարությանը

ՌԴ Դաշնության խորհրդի միջազգային հարցերի հանձնաժողովի նախագահի տեղակալ Վլադիմիր Ջաբարովը մեկնաբանել է ֆրանսիական «Ազգային միավորում» կուսակցության առաջնորդ Մարին Լը Պենի հայտարարությունը Ռուսաստանի հետ հնարավոր պատերազմի վերաբերյալ։ «Լենտա.ռու»-ի հետ զրույցում նա Լը Պենին անվանել է «ողջամիտ քաղաքական գործիչ»՝ նշելով, որ վերջինս գիտակցում է միջուկային տերության հետ ուղիղ հակամարտության հնարավոր հետևանքները։

Ավելի վաղ Լը Պենը հայտարարել էր, որ որոշ քաղաքական գործիչներ չափազանց հեշտությամբ են խոսում Ռուսաստանի հետ պատերազմի մասին, մինչդեռ, իր կարծիքով, նման հայտարարություններից պետք է խուսափել։ Նա նաև մեջբերել էր Շառլ Թալեյրանին վերագրվող խոսքը, ըստ որի՝ «ռուսական արջին որջից դուրս բերելու հազար եղանակ կա, բայց ոչ մեկը՝ նրան հետ քշելու համար»։

Ջաբարովը նաև անդրադարձել է Ֆրանսիայում սպասվող նախագահական ընտրություններին՝ կարծիք հայտնելով, որ Էմանուել Մակրոնի պաշտոնավարման ավարտից հետո Լը Պենը կարող է ամրապնդել իր դիրքերը երկրի ներքաղաքական պայքարում։ Սենատորի խոսքով՝ Լը Պենը ոչ թե ռուսամետ, այլ «ֆրանսամետ» քաղաքական գործիչ է։

Ավելի վաղ Լը Պենը հայտարարել էր նաև, որ Ֆրանսիայի ֆինանսական ծանր վիճակի պայմաններում երկիրն այլևս չի կարող շարունակել նախկին ծավալով ֆինանսական աջակցություն տրամադրել Ուկրաինային։