Դատախազությունը բողոքարկելու է «Չաղ Ռուստամի» նկատմամբ տնային կալանք կիրառելու որոշումը

Գլխավոր դատախազությունը բողոքարկելու է Ռուստամ Ստեփանյանի՝ «Չաղ Ռուստամի», նկատմամբ տնային կալանք կիրառելու դատարանի որոշումը։ Այս մասին 24News-ին հայտնել են Գլխավոր դատախազությունից։

Դատախազությունից նշել են, որ դատական ակտը ստանալուց հետո Վերաքննիչ բողոք կներկայացվի։

Հիշեցնենք՝ սեպտեմբերի 28-ին դատավոր Մասիս Մելքոնյանի որոշմամբ Ռուստամ Ստեփանյանի և Աշոտ Կուրեղյանի նկատմամբ կիրառված կալանքը փոխարինվել է տնային կալանքով։ Դատական նիստը անցկացվել է դռնփակ։

Ըստ մեղադրական եզրակացության՝ Ստեփանյանին մեղադրանք է առաջադրվել Սերգեյ Գրիգորյանի՝ «Ֆազի», սպանությունը կազմակերպելու և իրականացնելու մեջ։ Ըստ մեղադրանքի՝ Ստեփանյանը մի խումբ անձանց հետ նախնական համաձայնությամբ ձեռք է բերել և պահել հրազեն ու առնվազն 54 փամփուշտ, ապա Աշոտ Կուրեղյանի հետ կազմակերպել և ղեկավարել է մյուս ենթադրյալ հանցակիցների գործողությունները։

Սերգեյ Գրիգորյանը սպանվել էր 2024 թվականի հունիսի 11-ին՝ ժամը 23:15-ի սահմաններում։ Քննության տվյալներով՝ նրա և Ռուստամ Ստեփանյանի միջև դեռևս 2018 թվականից ձևավորվել էին թշնամական հարաբերություններ։