Օդանավակայանում 819 գրամ մեֆեդրոն է հայտնաբերվել․ ևս մեկ առաքանիում՝ 250 գրամ սինթետիկ թմրանյութ (տեսանյութ)

ՊԵԿ մաքսանենգության դեմ պայքարի վարչության աշխատակիցները «Արմենիա միջազգային օդանավակայաններ» ՓԲԸ-ի «Կարգո» բեռնային համալիրում մաքսային զննման են ենթարկել Հայաստան տեղափոխված միջազգային սուրհանդակային առաքանի։

Զննության ընթացքում սեղանի փաթեթավորման տարբեր հատվածներից հայտնաբերվել է ընդհանուր 819 գրամ մեֆեդրոն տեսակի թմրամիջոց։ Պարզվել է, որ առաքանին Հայաստանում պետք է ստանար Ուկրաինայի քաղաքացի Մ․Տ․-ն, որը նույն օրը ժամանել էր Հայաստան։ Նա ձերբակալվել է, իսկ դատարանը բավարարել է նրա նկատմամբ կալանքը որպես խափանման միջոց ընտրելու միջնորդությունը։

Մեկ այլ առաքանիի մաքսային զննության արդյունքում, բարձրախոսի կազմաքանդման ընթացքում, հայտնաբերվել է շուրջ 250 գրամ ՄԴՄԲ-022 տեսակի սինթետիկ թմրամիջոց։ Դեպքի առնչությամբ ձերբակալվել է ՀՀ քաղաքացի Ա․Պ․-ն, որի նկատմամբ ևս դատարանը կալանքը որպես խափանման միջոց կիրառելու միջնորդությունը բավարարել է։

ՊԵԿ-ի փոխանցմամբ՝ միայն վերջին մեկ ամսվա ընթացքում միջազգային փոխադրումների միջոցով Հայաստան տեղափոխված առաքանիներից հայտնաբերվել և ապօրինի շրջանառությունից դուրս է բերվել շուրջ 1,8 կգ մարիխուանա, 210 գրամ կոկաին, 285 գրամ մետամֆետամին, 58 գրամ ՄԴՄԱ և 114 գրամ հաշիշի յուղ, ինչպես նաև կարֆենտանիլ տեսակի թմրամիջոց։

Դեպքերի առթիվ նախապատրաստված նյութերը ներկայացվել են Քննչական կոմիտե։ Ձեռնարկվում են անհրաժեշտ քննչական և օպերատիվ-հետախուզական միջոցառումներ՝ ներգրավված բոլոր անձանց հայտնաբերելու ուղղությամբ։

ՊԵԿ-ը հիշեցնում է, որ հանցագործության համար մեղադրվող անձը համարվում է անմեղ, քանի դեռ նրա մեղավորությունն ապացուցված չէ օրինական ուժի մեջ մտած դատավճռով։