Պետք չէ թրերով ընդունել ՄԻՊ-ի զեկույցները

Վերջին շրջանում Մարդու իրավունքների պաշտպանը ներկայացնում է իր տարեկան զեկույցները, որում սեղմագրերով ներկայացված են լինում տարբեր գերատեսչությունների ձեռքբերումներն ու թերացումները:

Սովորաբար, ավելի զարգացած երկրներում, երբ պաշտպանն արձանագրում է որոշակի թերացումներ, դրան հաջորդում են այդ գերատեսչություններում արմատական բարեփոխումներ, անգամ ղեկավար մարմինները հրաժարական են տալիս: Օմբուդսմենի խոսքը սովորաբար շատ ավելի մեծ կարևորություն և ազդեցություն է ունենում, քան այսօր առկա է մեր երկրում: Ինչևէ, չփորձելով որևէ գնահատական տալ ՀՀ մարդու իրավունքների պաշտպան Կարեն Անդրեասյանի աշխատանքին՝ պաշտպանի անձնակազմի լրատվական բաժնի պետ Նաիրա Կարմիրշալյանից Lurer.com-ի թղթակիցը հետաքրքրվեց, թե ինչով է պայմանավորված օմբուդսմենի տարեկան զեկույցների նկատմամբ բուռն արձագանքը: Վերջինս, սակայն, խուսափեց որևէ գնահատական տալ նման արձագանքներին.

«Ես չեմ ուզում իրենց փոխարեն ինչ-որ մեկնաբանություններ տալ և կարծիք հայտնել. իհարկե, ողջունելի չէ, որ գերատեսչությունները նման կերպ են արձագանքում պաշտպանի զեկույցներին»,- ասաց խոսնակը՝ համաձայնվելով մեր այն տեսակետի հետ, որ պետք է պաշտպանի արձանագրած թերացումներից հետո տվյալ կառույցը համապատասխան փոփոխություններ իրականացնի, վերացնի թերացումները, այլ ոչ թե փորձի հակահարված տալ:

Թե ինչքանով պաշտպանի տարեկան զեկույցները փոփոխությունների հիմք կդառնան, դժվար է ասել, բայց այդ կառույցների արձագանքից հասկանալի է դառնում, որ պաշտպանի խոսքը քիչ թե շատ տեղ է հասել: