Ադրբեջանը պատրաստ է գազ մատակարարել Հայաստանին. հայտարարության մեսիջը

Վերջերս Ադրբեջանի պետական նավթային ընկերության նախագահ Ռովնաղ Աբդուլլաևը հանդես էր եկել հայտարարությամբ, ըստ որի` Ադրբեջանը կարող է գազ մատակարարել Հայաստանին: 

Նրա խոսքերով՝ Ադրբեջանը մարդասիրական պետություն է ու գիտակցում է տարածաշրջանային առաջնորդի իր դերը. եթե Հայաստանը դիմի իրենց գազի օգնության խնդրանքով, բնականաբար, իրենք կօգնեն Հայաստանին:

Լուրեր.com-ը զրուցեց ադրբեջանագետ Սարգիս Ասատրյանի հետ, ով նշեց, որ իրականում շատ հետաքրքիր երևույթ է, երբ պետական նավթային ընկերության նախագահն է հանդես գալիս նման հայտարարությամբ:

Ըստ ադրբեջանագետի` դժվար թե լիներ Աբդուլլաևի այս հայտարարությունը` առանց վերևների «դաբռոների»:

«Սեփական նախաձեռնություն սա դժվար թե կարելի է համարել: Ադրբեջանը փորձել է ցույց տալ, թե տեսեք` Հայաստանը այնքան վատ վիճակում է, որ չնայած ագրեսոր է և օկուպանտ, միևնույն է, մենք պատրաստ ենք ձեռք մեկնել մեր հարևանին: Մյուս կողմից` Բաքուն  Ռուսաստանին փորձել է հստակ ցույց տալ, որ տարածաշրջանում կարևոր խաղացողի է վերածվում նավթագազայի ոլորտում:

Սա նաև մեսիջ էր` ուղղված Ռուսաստանին, նման հայտարարության ուրիշ բացատրություն դժվար է գտնել»,- ասաց Ասատրյանը:

Վերջինս նշեց նաև, որ Աբդուլաևը ենթարկվել է նաև քննադատությունների. թերթերը քննադատել են նրան, թե ինչպես կարող էր նման հայտարարությամբ հանդես գալ:

Հարցին, թե այս խնդրի շուրջ քննարկումներ կլինեն, թե կսահմանափակվի միայն նման հայտարարությամբ, ադրբեջանագետն ասաց.

«Հնարավոր է` որոշակի քննարկումներ լինեն: Որոշակի հայտարարություններ կհնչեն, բայց չեմ կարծում, որ այդ թեման շատ շահարկվի, որովհետև թեման արդեն իսկ մեծ աղմուկ է բարձրացրել: Դա կարող է հստակ քաղաքական մեսիջ լինել, և հետագա զարգացումները կախված են տարածաշրջանում ընթացող քաղաքական իրավիճակի զարգացումներից»,- ասաց նա:

Նշենք նաև, որ ՀՀ էներգետիկայի և բնական պաշարների նախարար Արմեն Մովսիսյանը հայտնել է, որ լուրջ չի ընդունում Հայաստան գազի մատակարարման հնարավորության մասին Ադրբեջանի հայտարարությունը։

Գայանե Համբարձումյան