Տարոն Մարգարյանը հանդիպել է Հայաստանում Վրաստանի արտակարգ և լիազոր դեսպանի հետ

Երևանի քաղաքապետ Տարոն Մարգարյանը երեկ հանդիպել է Հայաստանի Հանրապետությունում Վրաստանի Հանրապետության արտակարգ և լիազոր դեսպան Թենգիզ Շարմանաշվիլիի հետ: Այս մասին հայտնում է Երևանի քաղաքապետարանի պաշտոնական կայքէջը: Բարձր գնահատելով հայ-վրացական հարաբերությունները՝ քաղաքապետն ընդգծել է, որ երկու ժողովուրդների բարեկամության դարավոր պատմությունն ու այդ համատեքստում ձևավորված ավանդույթները վստահաբար հիմք են հանդիսանում բարեկամ երկրների քաղաքների միջև գործընկերային կապերի էլ ավելի զարգացման և ընդլայնման համար։

Ներկայացնելով մայրաքաղաքի զարգացման առաջնահերթությունները՝ Տարոն Մարգարյանն ընդգծել է, որ Երևանն ու Թբիլիսին լայն հնարավորություն ունեն զարգացնելու գործընկերային հարաբերությունները մշակութային, կրթակական, զբոսաշրջության և մի շարք այլ ոլորտներում։ Քաղաքապետը կարևորել է նաև փորձի փոխանակումը տեղական ինքնակառավարման բնագավառում։
Դեսպան Շարմանաշվիլին քաղաքապետին վստահեցրել է, որ իր կողմից կանի հնարավորը՝ օժանդակելու Երևանի և վրացական քաղաքների համատեղ ծրագրերին, ինչպես նաև գործարար հետաքրքրություն ներկայացնող նախագծերին աջակցելու ուղղությամբ։